अग्रवाल र थापा समूहको भिडन्तले धितोपत्र बोर्ड १० महिनादेखि रिक्त, ३५ अर्बको आईपीओ पाइपलाइनमा

काठमाण्डौं । धितोपत्र बोर्ड १० महिनादेखि नेतृत्वविहिन रहेको छ । तत्कालिन धितोपत्र बोर्डका अध्यक्ष रमेश कुमार हमाल पुष २० गते बाहिरिए पछि सरकारले धितोपत्र बोर्डमा कुनै पनि व्यक्ति पठाउन सकेको छैन । स्रोतले दिएको जानकारीअनुसार अर्थमन्त्री र प्रधानमन्त्रीबीच नै टसल परेपछि धितोपत्र बोर्डमा नयाँ नियुक्ति हुन नसकेको हो ।  

राजनीतिक स्रोतका अनुसार अर्थमन्त्री विष्णु पौडेल पूर्व राष्ट्रपति विद्यादेबी भण्डारी खेमाका व्यक्ति हुन् । प्रधानमन्त्री ओली खेमामा शंकर पोखरेल, विष्णु रिमाल जस्ता व्यक्तिहरु रहेका छन् । झट् हेर्दा एउटै पार्टीको अर्थमन्त्री र प्रधानमन्त्री भएतापनि पार्टी भित्रै २ गुट हुँदा र दूई गुटलाई फरकफरक व्यापारिक समूहले लबिङ गर्दा लामो समयदेखि धितोपत्रबोर्डमा अध्यक्ष नियुक्ती हुनु सकेको छैन । स्मरण रहोस् अघिल्लोपटक प्रचण्ड सरकार हुँदा पनि प्रधानमन्त्री र अर्थमन्त्री एउटै पार्टीको भएतापनि नियुक्ती गर्ने व्यक्तिको विषयमा फरक धारणा रहँदा धितोपत्रबोर्डमा अध्यक्ष नियुक्ती हुन सकेको थिएन ।  

अर्को एक स्रोतले दिएको जानकारीअनुसार हाल बिचौलिया दीपक भट्ट पनि यो खेलबाट बाहिरी सकेका छन् । हालको समिकरण बनाउँदा अन्नपूर्ण पोष्टका सञ्चालक क्यापटेन रामेश्वर थापाको भूमिका प्रष्ट रुपमा देखिन्छ । उनी देउवा र ओली दुवैलाई रिजाउन सक्ने व्यक्ति भएको कारण दीपक भट्ट ओझेलमा परेका हुन् । स्रोतका अनुसार दीपक भट्टले अघिल्ला सरकारहरुलाई नै अर्बौ पैसा बुझाई सकेका छन् । हालको सरकार निर्माणमा रामेश्वर थापाको इन्ट्री भै सके पछि भट्ट ओझेलमा परेका हुन् । थापाले पनि अन्नपूर्ण स्टक एक्सचेञ्जको नाममा नयाँ स्टक एक्सचेञ्जको लागि आबेदन दिएका छन् ।  

नयाँ स्टक एक्सचेञ्जको लागि निवर्तमान अध्यक्ष रमेश कुमार हमालको कार्यकालमा नै तीन वटा समूहले आवेदन दिएका छन् । अध्ययन समितिले नयाँ स्टक एक्सचेञ्जका लागि अनुमति दिन सकिने जनाएपछि अब यी तिन समूहबीच तीव्र मोलमलाई र भिडन्त चलेको छ । यहि विषय पेचिलो बन्दा हाल धितोपत्र बोर्डको अध्यक्ष पनि सरकारले नियुक्ति गर्न सकेको छैन ।  

नयाँ स्टक एक्सचेञ्जका लागि ३ वटा समूहमा हिमालयन स्टक एक्सचेञ्ज, अन्नपूर्ण स्टक एक्सचेञ्ज र नेशनल स्टक एक्सचेञ्ज छन् ।  

लाइसेन्सका लागि आवेदन दिएको हिमालयन स्टक एक्सचेञ्ज शंकर ग्रुपअन्तगर्त हालको हिमायल रि इन्स्योरेन्समा लगानी गर्ने व्यापारीहरुको समूहको हो । यो समूहमा दीपक भट्टले बिचौलियाको काम गरेका छन् । दीपक भट्ट लगानी बोर्डका अध्यक्ष शुशिल भट्टका सहोदर भाई हुन् । हिमालयन स्टक एक्सचेञ्जमा भवानी राणा, शेखर गोल्छा र पशुपति मूरारका रहेका छन् ।  

त्यसैगरी नेशनल स्टक एक्सचेञ्जमा अग्नी ग्रुप र सिद्धार्थ ग्रुप रहेका छन् । यसमा एनआरएनए समूह पनि संलग्न छ । जसमा जीवा लामिछाने, बद्री केसी र कुल आचार्य पनि छन् । यो समूहले पनि नयाँ स्टक एक्सचेञ्जका लागि तीव्र लविङ गरेको थियो ।  

अर्को अन्नपूर्ण स्टक एक्सचेञ्जमा अन्नपूर्ण मिडिया हाउस रहेको छ । यसमा रामेश्वर थापालगायतका सुरेन्द्र वाग्ले, प्रकाश कुमार श्रेष्ठ र गणेश कुमार श्रेष्ठ रहेका छन् ।  

नयाँ स्टक एक्सचेञ्जमा आवेदन दिएर बसेका यी तीनै समूह आफू अनुकूलको सेबोन अध्यक्ष बनाउन सके स्टक एक्सचेञ्जको लाइसेन्स आफ्नो पोल्टामा पार्ने दाउमा छन् । पछिल्लोपटक थापा समूह र अग्रवाल समूहको भिडन्त तथा शक्ति केन्द्रमा ब्रिफकेश  बुझाउने खेल चल्दा धितोपत्र बोर्डमा १० महिनादेखि र सीडीएसीमा २ महिनादेखि नियुक्ती प्रक्रिया अन्यौलमा परेको छ । यी नियुक्ती अन्योलमा पर्दा धितोपत्र बोर्डमा ३५ अर्बभन्दा बढीको आईपीओ र हकप्रद पाइपलाइनमा नै रहेका छन् ।