मिस्टरबिस्टद्वारा टिकटक खरिद गर्ने इच्छा जाहेर

काठमाण्डौ । युट्युब तथा टिकटक स्टार ‘मिस्टरबिस्ट’ले टिकटक खरिद गर्न चाहेको बताएका छन् । अमेरिकामा सदाका लागि बन्द हुनबाट जोगिन ७५ दिनको समयावधि दिइएसँगै मिस्टरबिस्टले टिकटक खरिद गर्न चाहेको बताएका हुन् ।  

‘ठिक छ ! म टिकटक खरिद गर्छु ताकि यसमाथि प्रतिबन्ध नलागोस्,’ वास्तविक नाम जिम्मी डोनाल्डसन भएका मिस्टरबिस्टले एक्समा पोष्ट गरेका छन् । उनको भनाई मजाक जस्तो देखिएपनि उनी यस विषयमा गम्भिर भएको उनका वकिलले बताएका छन् ।

मिस्टरबिस्ट युट्युबमा सबैभन्दा धेरै सब्सक्राइबर भएका र टिकटकमा तेस्रो धेरै फलोअर्स भएका व्यक्ति हुन् । मिस्टरबिस्टले टिकटक खरिद गर्ने बताएसँगै अमेरिकामा टिकटकको बिक्रीको विषयले नयाँ मोड लिएको छ ।  

राष्ट्रव्यापी प्रतिबन्ध लागेसँगै गत शनिबार रातभर अमेरिकामा टिकटक बन्द भएको थियो । तर अमेरिकी राष्ट्रपतिमा डोनाल्ड ट्रम्प आएसँगै उनले टिकटकमाथिको प्रतिबन्ध ७५ दिनका लागि स्थगित गर्ने कार्यकारी आदेश दिएका थिए ।