नेपाललाई आइटी हब बनाउन नीति निर्माण गर्न सरकार तयारः सञ्चारमन्त्री गुरुङ

काठमाण्डौ । सञ्चार तथा सूचना प्रविधिमन्त्री पृथ्वीसुब्बा गुरुङले नेपाललाई आइटी हब बनाउन आवश्यक नीति, कानुन र पूर्वाधार निर्माण गर्न सरकार तयार रहेको बताएका छन् ।  

 

बिहीबार काठमाण्डौमा आयोजना भएको ‘क्यान इन्फोटेक’ को ३० औं संस्करणको उद्घाटन कार्यक्रममा बोल्दै मन्त्री गुरुङले यस्तो बताएका हुन् । उनले नेपाललाई आइटी हबको रूपमा विकास गर्न आवश्यक नीति, कानुन र पूर्वाधार निर्माणका लागि सहजीकरण गर्न मन्त्रालय तयार रहेको जानकारी दिए । उनले सरकार र निजी क्षेत्रको सहकार्यमा नेपाललाई आइटी हबको रूपमा विकास गरी विश्वलाई चिनाउनु पर्नेमा जोड दिए ।

सञ्चारमन्त्री गुरुङले भने, ‘‘आइटी क्षेत्र भर्खर सुरु गरेका छौं । आइटी क्षेत्रलाई आइटी हबका रूपमा विकास गर्न आवश्यक नीति, कानुन र पूर्वाधार निर्माणका लागि सहजीकरण गर्न मन्त्रालय तयार छ । तपाईंहरू मेहनत र हिम्मतका साथ काम गर्नुस् । नेपाललाई आइटी हबको रूपमा चिनाउनु पर्छ ।’

सञ्चारमन्त्री गुरुङले आइटी क्षेत्रबाट यो वर्ष गत वर्षभन्दा धेरै राजस्व सङ्कलन हुने विश्वास रहेको बताए । उनले सरकारले ल्याएको अध्यादेश प्रभावले राजस्व बढाउन सक्ने उल्लेख गरे । उनले नेपालमा पर्यटनभन्दा आइटी क्षेत्रको योगदान बढी हुने अवस्था रहेको बताए ।

‘‘सरकारले नेपालको आफ्नै स्याटालइट बनाउने भनेका छौं । नाष्ठका वैज्ञानिक भेट हुनुभएको थियो । नेपालका वैज्ञानिकहरूले बनाएको डिजाइन गरेको ५० किलो ग्रामको भारतको पनि सहयोगमा प्रक्षेपन गर्दैछौं भन्नुभयो । यो हाम्रो सुरुवात हो ,’ सञ्चारमन्त्री गुरुङले भने, ‘‘काम गर्ने वातावरण सरकारले बनायो भने वैज्ञानिक खोज्न नासामा जानु पर्दैन । मुलुकभित्रै उत्पादन हुने रहेछ । सरकारले त्यो काम गर्छ । यो वर्ष गत वर्षभन्दा धेरै राजस्व सङ्कलन हुने विश्वास छ । सरकारले ल्याएको अध्यादेश प्रभाव बनाउँछ ।’