बलेफी हाइड्रोको सेयर १०% घटेर २ अर्ब माथिको कारोबार, कसले किन्यो कसले बेच्यो ? यस्तो छ भित्रि रहस्य

काठमाण्डौ । आज नेप्सेमा बलेफी हाईड्रो पावर कम्पनीको उच्च कारोबार भएको छ । आज नेप्सेमा यो कम्पनीको मात्रै २ अर्ब १ करोडमाथिको कारोबार भएको छ ।  

यो भनेको कुल कारोबारको झण्डै २५ प्रतिशत हुन आउछ । यो कम्पनीले आज उच्च कारोबार  उच्च  भोल्युम  र उच्च गिरावट गरेर ३ वटा रेर्कड बनाएको छ ।

यो कम्पनीको आज एकै दिन ८७ लाख कित्ता सेयर कारोबार भएको छ ।  

कम्पनीको सेयरमा बिक्री दबाब पर्दा सेयरमूल्यमा समेत उच्च गिरावट आएको छ । कम्पनीको सेयरमूल्य आज सर्वाधिक अर्थात ९.९ पतिशतले घटेर प्रतिकित्ता २२९.७० रुपैयाँमा खुम्चिएको छ । एकाएक कम्पनीको उच्च कारोबार भएपछि यस विषयमा सामाजिक सञ्जालदेखि ब्रोकर हाउससम्म कारोबार समयमा नै खैलाबैला मच्चिएको थियो । एक लगानीकर्ताले क्लबहाउसमा लामो समय पछि जलविद्यसत कम्पनीको उच्च सेयर संख्यामा कारोबार भएको पहिलो पटक भएको दाबी गरे ।  

यसैगरि, आज  ब्रोकर हाउसहरुमा पनि यो कम्पनी निकै सोधखोज भएको थियो । कम्पनीले गत वर्ष शतप्रतिशत अर्थात एक बराबर एक कित्ता सेयर हकप्रद निष्कासन गरेको थियो । उक्त हकप्रद सेयर गत चैत २२ गते नेप्सेमा सूचीकृत भएको थियो । नेप्सेमा कम्पनीको कुल १ करोड ४२ लाख ७९ हजार ७०० कित्ता सेयर सूचिकृत भएको थियो ।  

यससँगै यो कम्पनीको चुक्तापूँजी ३ अर्ब ४७ करोड ६० लाख पुगेको छ । यस्तै गत चैत २९ गते संस्थापक सेयर, स्थानिय बासिन्दाका लागि बाँडफाँड गरिएको तथा कर्मचारीका लागि सुरक्षित गरिएको कम्पनीको १ करोड ६५ लाख २४ हजार ४८९ कित्ता सेयरको लक इन अवधि गत चैत २९ गते समाप्त भएको थियो । बजार जानकारहरुले कम्पनीका संस्थापकहरुले लक इन अवधि खुलेसँगै दोस्रो बजारमा सेयर बिक्री गरेकाले आज कम्पनीको उच्च कारोबार भएको बताएका छन् ।  

आज कम्पनीको सेयर नीभ सेक्यूरिटिजबाट साढे सात लाख बराबर, नासा सेक्यूरिटिजबाट करिब साढे ३ लाख सनी र इम्पेरियल सेक्यूरिटिबाट करिब ३/३ लाखको दरले कारोबार भएको छ । यसरी ब्रोकर फ्लोरसिट् विश्लेष्ण गर्दा कम्पनीको सेयर ठूला ब्रोकरहरुबाट बाँडिएर नै कारोबार भएको छ । यो कम्पनीको भृकृटी स्टक डिलर , आशुतोश ब्रोकेज एण्ड सेक्यूरिटिज र नासा सेक्यूरिटिजबाट नै उच्च बिक्री भएको छ । यस विषयमा बोल्दै नेप्सेका प्रवक्ता मूराहरी पराजुलीले बलेफी हाइड्रोको उच्च कारोबार हुनुको पछि कुनै विशेष कारण नभएको र यो नियमित कारोबार भएको बताए । पराजुलीले अक्सन तथा हकप्रदबाट आएको सेयर बिक्री भएको कारण उच्च कारोबार देखिएको बताए । ब्रोकर हाउसमा नै भेटिएका एक लगानीकर्ताले अक्सनमा सस्तोमा सेयर परेका लगानीकर्ताले राम्रौ मूल्यमा सेयर बेचेको प्रतिकृया दिए ।

सामाजिक सञ्जालमा रमेश भट्टराई नाम गरेका लगानीकर्ताले भने,‘लकिङ खुलेकै दिन प्रमोटर भाग्नु भनेको हाईड्रोमा ५१ प्रतिशतको नियम बनाउनु पर्ने सेबोनले बुझोस् ।’