चीनले सार्वजनिक गर्‍यो विश्वकै सबैभन्दा सस्तो ह्युमोनोइड रोबोट ‘बुमी’

काठमाण्डौ । ह्युमानोइड रोबोट प्रविधिमा तीव्र विकास भइरहेका बेला चीनले विश्वकै सबैभन्दा सस्तो ह्युमानोइड रोबोट सार्वजनिक गरेको छ। ‘बुमी’ नामक यस रोबोटको मूल्य केवल ९ हजार ९९८ युआन (करिब १ हजार ४०० अमेरिकी डलर) तोकिएको छ।

यो रोबोट विशेष गरी बालबालिकासँग संवाद गर्न, शिक्षा दिन तथा रोबोटिक्स र कृत्रिम बुद्धिमत्ता(एआई) सिकाउन डिजाइन गरिएको हो। चीनको यो पहलले विश्व रोबोटिक्स बजारमा ठूलो प्रभाव पार्ने अपेक्षा गरिएको छ।

शिक्षा क्षेत्रमा नयाँ सम्भावना

बुमी हल्का तौल र सानो आकारको ह्युमानोइड रोबोट हो। यसले हिँड्न, दौडन, नाच्न र मानिससँग कुराकानी गर्न सक्छ। ड्र्याग–एन्ड–ड्रप टुल प्रयोग गरेर सजिलै प्रोग्राम गर्न सकिने भएकाले यो विद्यालय, विश्वविद्यालय र परिवारहरूका लागि किफायती विकल्प बनेको छ।

महँगा ह्युमानोइड रोबोट किन्न नसक्ने शैक्षिक संस्थाहरूका लागि बुमीले रोबोटिक्स शिक्षामा नयाँ अवसर खोल्ने विश्वास गरिएको छ।

जनवरी २०२६ बाट बिक्री सुरु

बुमीको व्यावसायिक बिक्री जनवरी २०२६ बाट सुरु हुने कम्पनीले जनाएको छ। यससँगै चीन आम उपभोक्तालाई लक्षित ह्युमानोइड रोबोट बजारमा अग्रणी राष्ट्रको रूपमा उभिने तयारीमा देखिएको छ।

ठूला सम्झौता सम्पन्न

चीनको सोंगयान पावर कम्पनीले हुआईचेन टेक्नोलोजीसँग सम्झौता गर्दै १ हजार वटा बुमी ह्युमानोइड रोबोट आपूर्ति गर्ने सहमति गरेको छ।

अमेरिकी रोबोटभन्दा धेरै सस्तो

अमेरिकामा विकसित ह्युमानोइड रोबोटहरू हाल अत्यन्तै महँगा छन्। टेस्लाको अप्टिमस रोबोटको अनुमानित मूल्य २०,००० देखि ३०,००० डलर सम्म हुन सक्छ भने एजिलिटी रोबोटिक्सको डिजिट रोबोटको मूल्य करिब २,५०,००० डलर रहेको छ। यी रोबोटहरू उद्योग र गोदामका लागि डिजाइन गरिएका हुन्।

यसको विपरीत, चीनले कम लागतमा उत्पादन गरी व्यापक प्रयोगमा ल्याउने रणनीति अपनाएको देखिन्छ।

ह्युमानोइड रोबोट भनेका मानिसजस्तै आकार, हाउभाउ र व्यवहार गर्न सक्ने रोबोट हुन्। यस्ता रोबोटले हिँड्न, बोल्न र मानवसँग अन्तरक्रिया गर्न सक्छन्।