समानुपातिक मतको अपडेट: रास्वपाको प्रतिशत घट्दै जाँदा कांग्रेस/एमाले बढाउँदै

काठमाण्डौ । समानुपातिकतर्फको जारी मतगणनामा प्राप्त पछिल्लो परिणामअनुसार राष्टिय स्वतन्त्र पार्टीले फराकिलो अग्रता कायमै राखेको छ । तर, उसको मत प्रतिशत भने निरन्तर घटिरहेको छ ।  

केहीबेरअघि प्राप्त ताजा अपडेटअनुसार समानुपातिकतर्फ ८ लाख २९ हजार ४२८ मत गणना हुँदा रास्वपाले ४ लाख २१ हजार ११ मत प्राप्त गरेको छ । यो भनेको ५०.७५ प्रतिशत हो । यसअघिको अपडेटमा रास्वपाले समानुपातिकतर्फ ५३ प्रतिशत हाराहारीमा मत पाएको थियो । सुरुवाती गणनामा भने ६२ प्रतिशतको रेञ्जमा मत प्राप्त भएको देखिएको थियो । 

कांग्रेसको मत भने क्रमशः बढिरहेको देखिएको छ । यसअघिको अपडेटमा कुल गणना भएको मतको १६ प्रतिशत हाराहारी मत पाएको कांग्रेसले अहिलेको अपडेटमा भने कांग्रेसले गणना भएको कुल मतमध्ये १७ प्रतिशत बढी प्राप्त गरेको छ । उसले अहिलेसम्म १ लाख ४३ हजार ६८६ मत पाएको छ ।  

एमालेको समानुपातिक मत प्रतिशत पनि बढिरहेको देखिन्छ । यसअघिसम्म १३ प्रतिशत हाराहारी मत देखिएकोमा अहिले भने कुल गणना भएको मतको १४ प्रतिशत मत एमालेले पाएको छ । पछिल्लो अपडेटअनुसार एमालेले १ लाख १५ हजार ५५९ मत प्राप्त गरेको छ । 

नेकपाको मत प्रतिशत पनि ह्वात्तै बढेको छ । अघिल्लो अपडेटअनुसार ५ प्रतिशत हाराहारी मात्र मत पाएको यो दलले अहिलेको अपडेटअनुसार चाहिँ ७ प्रतिशत मत पाएको छ । ५८ हजार २५५ मत नेकपाले हालसम्म पाएको छ ।  

राप्रपाको मत प्रतिशत पनि घटिरहेको देखिएको छ । यसअघिको अपडेटमा ४ प्रतिशत बढी मत पाएको राप्रपाले पछिल्लो अपडेट अनुसार ३.५ प्रतिशत मत पाएको छ ।  

श्रम संस्कृतिको मत प्रतिशत पनि घटिरहेको छ ।