रास्वपाको ५६ जिल्लामा अधिवेशन सम्पन्न, १२ जिल्लामा निर्वाचन प्रक्रिया जारी, केहीमा भने आन्तरिक विवादले रोकियो

काठमाण्डौं । राष्ट्रिय स्वतन्त्र पार्टी (रास्वपा)ले संगठन विस्तार अभियानलाई तीव्र बनाउँदै जिल्लामा अधिवेशन सम्पन्न गरेको जनाएको छ ।

पार्टीका अनुसार हालसम्म ५६ जिल्लामा अधिवेशन सम्पन्न भइसकेका छन् भने १२ जिल्लामा निर्वाचन प्रक्रिया जारी छ ।

शनिबार र आइतबार दुई चरणमा सञ्चालन गरिएको जिल्ला अधिवेशनअन्तर्गत पहिलो दिन ३८ जिल्लामा अधिवेशन सम्पन्न भएको र दोस्रो दिन २८ जिल्लामा प्रक्रिया अघि बढाइएको रास्वपाले जनाएको छ ।

अधिकांश स्थानमा नयाँ जिल्ला कार्यसमिति पनि चयन भइसकेको छ ।

प्रवक्ता मनिष झाका अनुसार कोशी प्रदेशका झापा, मोरङ, सुनसरी, इलाम, पाँचथर, ताप्लेजुङ, तेह्रथुम, भोजपुर, संखुवासभा, ओखलढुंगा, सोलुखुम्बु, खोटाङ र धनकुटामा अधिवेशन सम्पन्न भइसकेको छ ।  

उदयपुरमा भने निर्वाचन तयारी भइरहेको छ ।

मधेश प्रदेशमा महोत्तरी, रौतहट, सिरहा, पर्सा र सर्लाहीमा अधिवेशनपछि निर्वाचन प्रक्रिया अघि बढेको छ भने सप्तरी र बारामा आज तथा धनुषामा मंगलबार अधिवेशन हुने बताइएको छ ।

बागमती प्रदेशका अधिकांश जिल्ला—काठमाडौं, ललितपुर, भक्तपुर, काभ्रे, चितवन, मकवानपुर, नुवाकोट लगायतमा अधिवेशन सम्पन्न भइसकेको छ भने सिन्धुपाल्चोकमा प्रक्रिया स्थगित गरिएको छ ।

गण्डकी प्रदेशका स्याङ्जा, कास्की, तनहुँ, पर्वत, लमजुङ, म्याग्दी र गोरखामा अधिवेशन सम्पन्न भएपनि बागलुङमा विवादका कारण प्रक्रिया रोकिएको छ ।  

नवलपरासी पूर्वमा निर्वाचन जारी छ ।

लुम्बिनी, कर्णाली र सुदूरपश्चिम प्रदेशका अधिकांश जिल्लामा पनि अधिवेशन सम्पन्न भइसकेका छन् भने केही जिल्लामा निर्वाचन प्रक्रिया बाँकी रहेको प्रवक्ता झाले जानकारी दिएका छन् ।

पार्टीले अब २६ जेठदेखि प्रदेश अधिवेशन सुरु गर्ने र त्यसपछि ७ देखि ९ असारसम्म चितवनमा पहिलो राष्ट्रिय महाधिवेशन गर्ने तयारी गरेको छ ।

यसअघि रास्वपाले ४ हजारभन्दा बढी वडा र ५ सयभन्दा बढी पालिकामा अधिवेशन सम्पन्न गरिसकेको बताउँदै संगठनलाई तल्लो तहदेखि मजबुत बनाउने अभियान अघि बढाइरहेको जनाएको छ ।