प्रतिनिधि सभा सदस्य निर्वाचन-२०८२

निर्वाचनका दिन ओलीले सम्झिए सुखानी शहीद र आफ्नो जीवनको चुनौती

काठमाण्डौ । नेकपा एमालेका अध्यक्ष केपी शर्मा ओलीले प्रतिनिधिसभा निर्वाचनका अवसरमा सुखानी शहीद दिवस तथा आफ्नो व्यक्तिगत स्वास्थ्यसँग सम्बन्धित अनुभव साझा गरेका छन्।

फेसबुक पोष्टमा उनले आजका दिन जीवनका दुई महत्वपूर्ण घटनाहरू सम्झन लायक भएको लेखेका छन्। ‘आज मेरो जीवनका दुई संयोगहरु भएको दिन हो । आज सुखानी शहीद दिवस हो भने आजकै दिन ६ वर्षअघि मेरो दोस्रो पटक मिर्गौला प्रत्यारोपण भएको थियो। यी दुवै दिन मैले मृत्युको मुखमा पुगेर पुनर्जीवन पाएका दिन हुन्,’ उनले लेखेका छन् ।

मतदानका लागि घण्टौँ पैदल हिँड्न बाध्य मतदाता

काठमाण्डौ । बाँकेको नेपालगञ्ज क्षेत्रका मतदाताहरू मतदान गर्नका लागि लामो दूरी पैदल यात्रा गर्न बाध्य भएका छन्। तराईको दक्षिण–पश्चिमी क्षेत्रमा भारतको सीमासँग जोडिएको यस क्षेत्रका धेरै नागरिकहरू मतदान केन्द्र पुग्न घण्टौँ हिँडेर तथा केहीले अघिल्लो दिन नै घरबाट निस्कनु परेको बताएका छन्।

स्थानीय मतदाता सरिता रोका राप्तीले मतदान गर्न आउन निकै कठिन भएको बताइन्। ‘हामी हिजै घरबाट निस्केर यहाँ आइपुगेका हौँ। घरमा अहिले मेरा साना बच्चाहरू मात्र छन्,’ उनले भनिन्।

अर्काको नाममा मत हाल्न खोज्ने युवक पक्राउ

काठमाण्डौ । प्रतिनिधिसभा सदस्य निर्वाचनका क्रममा अर्काको नाममा मत हाल्ने प्रयास गरेको आरोपमा रौतहटमा एक किशोर पक्राउ परेका छन्। प्रहरीले राजपुर नगरपालिका–९ बौरिया निवासी १८ वर्षीय अरजे हयातलाई नियन्त्रणमा लिएको जनाएको छ।

जिल्ला प्रहरी कार्यालय रौतहटका अनुसार उनले अनाथालय मतदान केन्द्रमा महमद आसिकको नाममा मत हाल्ने उद्देश्यले लाइनमा बसेको अवस्थामा शंका लागेपछि प्रहरीले सोधपुछ गर्दा घटना खुल्न आएको हो। प्रहरी निरीक्षक देवी राम भण्डारीको नेतृत्वमा खटिएको टोलीले उनलाई नियन्त्रणमा लिएको हो।

सुदूरपश्चिममा करिब ३० प्रतिशत मतदान

काठमाण्डौ । प्रतिनिधिसभा निर्वाचनअन्तर्गत सुदूरपश्चिम प्रदेशमा हालसम्म करिब ३० प्रतिशत मतदान भएको छ। प्रदेश निर्वाचन कार्यालयका अनुसार अपराह्नसम्म २९.६६ प्रतिशत मत खसेको हो।

इलाममा १०७ वर्षीया विष्णुमायाले गरिन् मतदान

काठमाण्डौ । इलाममा १ सय वर्ष कटेकी वृद्धाले मतदान गरेकी छन् । विष्णुमाया बानियाँले चुलाचुली गाउँपालिका–६ तोरीबारीस्थित गीताञ्जली आवि मा रहेको मतदान केन्द्रमा मतदान गरेकी हुन्। १०७ वर्षीया बानियाँ आफन्तको साथमा मतदान केन्द्र पुगेर दिउँसो मताधिकार प्रयोग गरेकी हुन् ।