भारतको सेयर बजार इतिहासकै उच्च, फेडको ब्याजदर कटौतीले विदेशी लगानी भित्रने विश्वास

काठमाण्डौ । भारतीय सेयर बजारमा आज उच्च अंकको वृद्धि भएको छ । आज भारतको सेयर बजार मापक इन्डेक्स सेन्सेक्स १३ सय अंकले बढेर ८४ हजार ५४४ सय विन्दुमा पुगेको छ ।  

त्यस्तै निफ्टी५० पनि ३७५ संकले बढेर २५ हजार ७९० विन्दुमा पुगेको छ । यो उचाई हालसम्मकै उच्च हो ।  

सेन्सेक्समा कारोबार हुने ३० वटा कम्पनीको सेयरमध्ये आज २६ वटा कम्पनीको सेयरमूल्य बढ्यो भने ४ वटाको मूल्यमा मात्रै गिरावट आयो । निफ्टीमा कारोबार हुने ५० सेयरमध्ये आज ४४ वटा कम्पनीको सेयरमूल्यमा हरियाली छायो भने अन्य ६ वटामा  मात्रै घटे ।  

सेन्सेक्सको आज रियल्टी सेक्टरमा उछाल आयो । यो सेक्टर आज ३.०५ प्रतिशतले बढ्यो । यस्तै अटो १.८८ प्रतिशत,मेटल १.६५ प्रतिशत र वित्त सेवा १.५८ प्रतिशतले बढ्यो ।  

अघिल्लो दिन पनि भारतीय सेयर बजारले अल टाइम हाईको उचाई चुमेको थियो । त्यसदिन सेन्सेक्स इन्डेक्स ८३ हजार १८४ र निफ्टी २५ हजार ४१८ विन्दुमा पुगेको थियो ।  

अमेरिकी केन्द्रीय बैंक(फेड)ले ब्याजदरमा कटौती गरेसँगै भारतको केन्द्रीय बैंकले पनि ब्याजदर घटाउने अपेक्षा भारतीय विज्ञहरुले गरेका छन् । जसका कारण भारतको सेयर बजारमा तीव्र वृद्धि देखिएको छ ।  

अघिल्लो दिनहरुमा मिडक्याप र स्मल क्याप कम्पनीहरुको भईरहेको नाफा बुक आज रोकिएको छ । यी कम्पनीहरुमा आज लगानीकर्ताले खरिद  बढाएका छन् । बीएसई मिडक्याप आज १.१६ प्रतिशत र स्मलक्याप १.३७ प्रतिशतले बढ्यो ।  

अमेरिकामा भएको ब्याजदर कटौतीका कारण तरलता बढ्ने र भारतीय सेयर बजारमा विदेशी लगानीकर्ताले लगानी बढाउने अपेक्षाका साथ भारतको बजारमा खरिद चाप बढेको छ । जसको परिणामस्वरुप बजार उकालो लागेको छ ।